الدكتور محمد طه أستاذ الإعلام بالأزهر مرتديا ثوب حاتم الطائي

نشر جروب جامعة القاهرة نموذجا رائعا ورموز مضيئة يجب أن يحتذى به انه حاتم الطائي الدكتور محمد طه أستاذ الإعلام بجامعة الأزهر حيث تناول مواقفا 

( دكتور محمد طه أستاذ في كلية الإعلام جامعة الأزهر، والحقيقة لا يخفى اسمه ولا صورته على أحد، معلوم عن الدكتور محمد إنه قبل ما يبدأ شرح كلمة لازم يفطّر كل الطلبة، كل واحد سندوتشين واحد فول وواحد طعمية، وبعد ما يتأكد إننا أكلنا يخلي العامل يدخل ومعاه صينية كبيرة فيها كوبايات شاي، كل طالب كوباية يشربها أثناء الشرح! 

أتذكر مرة وأنا في سنة تانية دخل قال للعامل يلا فطر الأولاد علشان نبدأ، العامل راح ورجع قاله: الكافتيريا قافله النهاردة! 

قاله لا، أنا مش هقول كلمة إلا لما يفطروا، اتصرف! 

والله العامل راح جاب علب كيك من الكبيرة، كل واحد اتنين، بعدين دخل بالشاي بعده. 😀❤️

آخر محاضرة بقا على وجه التحديد الأسبوع اللي فات دا، المحاضرة كانت تقريبًا الظهر، يعني ممكن تبقا ناس فطرت، ودا وقت الغداء، جاب للكلية كلها، مش هقول مدرجنا بس، الكلية كلها والله بجميع أقسامها علب مكرونة بصلصة عليها شرائح كبدة بلدي من فوق، اللي هي الصورة تحت دي! 

العلب كتيرة لدرجة إنه لو فيه حد من بره الكلية عايز ما كانوش هيقولوله لا، وكان هياخد فعلا، إن ما كانش حد أخد. دخلت أصور كمّ العلب اللي تحت، لكن كان الرد بالحرف: يا ابني هو اللي بيعمل الخير بيصوره!! 😍

بعدين دخل العامل بالصينية الكبيرة اللي فيها كوبايات الشاي، كل واحد كوباية يشربها أثناء الشرح. 

والله أول ما دخل المدرج بنقوم نقف لحضرته، قال اقعد يا ابني انت وهو ما تقوموش لي تاني، القيام لله وحده. 

ولمن لا يعرف الدكتور محمد طه، عنده ساحة بجوار المسجد اللي بنيه - مسجد حمدي طه - الساحة دي شغال طول السنة مائدة غدا وعشا، بييجي فيها كل يوم عدد مهول من الناس وخاصة أطفال الشوارع، اللي لما تحدثت معه على انفراد قاللي إنه أكثر من 350 طفل شارع باعتبرهم زي أولادي بييجوا عندي الساحة كل يوم، وكان موفرلهم سكن كمان! 

ناهيك عن الأكل وخلافه، الدكتور محمد طه تتكلم معاه كأنك بتتكلم مع أخوك الكبير، متواضع إلى أبعد حد ممكن، ويرشدك ويدلّك وما يبخلش عليك بعلومة، وفي الشرح حدث ولا حرج به.

نشرت هذا الكلام عملًا بقول النبي صلى الله عليه وسلم: من لا يشكر الناس لا يشكر الله. ♥️