مصر ام الخير

 

بقلم الشاعر :محمد علي راشد 

مصر ام الخير.. على طول السنين 

مصر هاجر

مصر يوسف

مصر أرض المؤمنين..

يجري فيها النيل ويسقي العطشانين

قمحها طارح سنابل من حنين

بالأمل فارد جناحه ع السنين 

ربنا يبارك في خيرها 

بادعي وتقولوا امين ..

....................

مصر واقفه 

صالبه عودها ..من زمان 

مصر عارفه ..

إن وجودها ..فيه الأمان 

مصر حتى لو تبات يوم في الأنين

تمسح الدمعه بعرقها ع الجبين

شمسها تطلع بناسها الطيبين..

قمحها طارح سنابل من حنين 

بالأمل فارد جناحه ع السنين 

ربنا يبارك في خيرها 

بادعي وتقولوا امين 

..........................

مصر دعوه ..

من امام المرسلين ..

صوره حلوه ..

للأئمة...المتقين ...

من مدد سيدنا الحسن 

من مدد سيدنا الحسين 

يا مدد يا ستنا زينب امين

من مدد سيدنا علي زين العابدين

مصرنا طارحه سنابل من حنين 

بالأمل فارد جناحه ع السنين 

ربنا يبارك في خيرها 

بادعي وتقولوا امين 

...........................

الشاعر محمد علي راشد

جميع الحقوق محفوظه للشاعر