روبابيكيا
بقلم الشاعرة / علا عبد الدايم
انا بتاعة الروبابيكيا
انا بتاعة الكراكيب
قرب يا بيه
قربى يا هانم
انا هنا ليكم
فى حد مضايق اى حد مخنوق من الكراكيب
ولو زعلان هانسيه همومه
واشيل من حزنه لاحزانى
وافيض عليه من فرحى
وفى الاخر يمشى وينسانى
انا هنا اجمل واتحمل
واعيش للكل واداوى
قرب هنا عندى كتيير من الافراح
ضحكة جميلة او نكتة
ولو مضحكتش
ممكن اضحك على نفسى واوجاعى
احكيللك قصة عن هيبتى
وعن خيبتى واوجاعى
لشخص مزور وانانى
ماهو اصله كان من الكراكيب
فضلته كتيير على نفسى
فجملته وحليته
وبقى شخصيه
كان دبلان وفصلان
ومهزوز ومهزوم
وعشواءى وكداب كالعادة
ويتجمل ويتشقلب
لينول الرضا وزيادة
كان قديم كان حنين
كان طيب لمصلحته وبزياده
كان كداب ومنافق
ولابس وش المساكين
فجملته وحليته
فاتغر واتكبر لما بص فى مرايه
واخده الغير.
انا بتاعة الروبابيكيا انا بتاعة الكراكيب
قرب يا بيه قربى يا هانم
حد عنده شىء راميه
قلب مستغنى عنه وزهد فيه
بس بشرط
مايحلاش تانى فى عينه
واستغنى عنه وزهد فيه
استنى يا هانم استنى يا بيه
ايوه
أمضى واختم كمان
قرار تنازل عن الكراكيب
قرار تنازل عن اى شىء
الذكريات والامنيات والاوجاع
وانك زاهد فيه
لا لسة !!
اعلنو كفركم بيه
قبل ما ابداء حب فيه
علشان يوم ما هيدا
مش هابطل اجيب فى سيرته
ولا هبطل احب فيه.
وهارجع تانى اجمل واتحمل
نفوس مريضة تعبتنى
واخدت فرحى ورمتنى
فى كأس مر وكسرتنى
ها يا بيه ها يا هانم
انا بتاعة الكراكيب
حد عنده شىء راميه
انا خدت العهد من البداية
مكتوب عليا كده
مخدش اى شىء سعيد
مخدش اى شىء جديد
اوعو تحسبوها عيب
اخد شىء من الكراكيب
انا غيركم
انا بشوفها بعين محبة للتفاصيل
صدقونى
لو شوفتوها بعنييا
هاتحبو كل شىء فيها
انا اصلى جوهرية
مابيهمنييش التراب اللى مغطية
مدام الماظ مهما يعمل الزمن فيه
لا عنكبوت عشش على قلب حزين مكسور
انا شايفاه دهب والماظ
بيغنى لعبد الحليم
هايتلمع ويتجمل
واشوفه بعين صايغ
بعين محبة للتفاصيل
اصل انا كدة ربنا خلقنى حساسة
وعينى غير كل البشر
لما تحب بتحب بزيادة
انا بتاعة الكراكيب
هابتدى أغنى وادندن لاغنية قديمة زيى
انا بقيت من الكراكيب
بحبها وبعشقها لان فيها شىء جميل
اسمع كدا (امل حياتى ) يا حب غالى
لا استنى فى اللى اجمل منها
( كنت بشتاقللك وانا وانت هنا )
ومن هنا
ولحد ما اقوم من تانى
انا كرهت الكراكيب
ولما تشوفونى اوتلمحونى
اوعو تنادو من تانى
اصلكم وجعتونى
لما عرفتوا انى حبتكم وبزيادة
وكالعادة
شاورتو عليا وقولتو
دى بتاعة الروبابيكيا
دى بتاعة الكراكيب
موجودة دايما ووقت مانعوزها هنلاقيها
بتصلح أوجاع فينا يمكن هنا او هنا
فى كل مكان موجودة
وتشكو من صوتى العالى
وقولوا يالا من تانى
خنقانى وخيلانى
وتعبانى بصوتها المزعج
وسؤالها ديما وقرفانى
دى بتاعة الكراكيب
هاتصلح وهاتجمل وتتحمل
ونسيتو فضلى عليكم ونسيتو أنكم كراكيب
انا هامشى وهارميكم
باحزانكم واوجاعكم
وهارجع تانى اميرتكم
اصل انا خفيت
واستغنييت
وبقيت اشترى جديد
ومبقتش بتاعة الكراكيب.
قلم/ علا عبد الدايم
ليست هناك تعليقات